Latest articles by Staff Writer
3 articles written by this author
移民，人走，但錢銀又點安排？ (利世民)
「港版國安法」令到香港再次掀起移民潮。今期阿啤邀得利世民分享一下究竟大家可以點樣安排資產。一﹕移民，似乎都係大家要做嘅一個決定。去邊，真係見仁見智。有人鍾意英美加澳紐，有人鍾意星馬台泰日，甚至有人話要返大灣區；每個人都有自己嘅考慮，好難話邊度最好。如果唔係搞到家陣嘅死局，最好，一定係香港。二﹕依家諗移民嘅香港人，睇怕都有個錢旁身，最少都有個強迫金戶口，甚至有一兩層樓揸手。不過，無論你手上有幾多資產，除非你已經有財務自由，完全百份百靠被動收入過日子，移民嘅首要準備，就係管理未來一段日子嘅現金流。可以好肯定咁講，你將會有唔少開支，收入亦點都會受影響。另外，就係稅務問題；香港嘅稅制出名簡單，去到外國我可以寫包單，報稅交稅嘅過程，係一次 cultural shock，會令你更加懷念呢個我哋要被迫放棄嘅家。「當交保護費囉。」無錯，我都係咁同自己講。三﹕有啲國家，環球徵稅；稅局唔單止要知道你外國嘅收入，亦都要知道係外國嘅資產，包括銀行戶口、股票、物業等等。當然，報稅係睇你講幾多；你要隱瞞，梗有方法。四﹕不過，點都要溫馨提醒各位準備移民嘅手足。由獲得居留權到正式成為公民，通常都要幾年時間。假如呢幾年你又冇做嘢但又久不久從海外戶口存錢畀自己用，但又唔交稅，移民局嘅人應該都見唔少呢類申請；公務員交足稅，最憎就係個啲唔交稅嘅人。呢句說話，我講嘅。五﹕有啲國家，直頭建議你移民嘅時間，將主要嘅流動資產，例如現金，匯過去。人走，錢唔走，只係反映你都唔係真心想歸化，係咪？又有啲國家，特別係美國，只要你有義務要交稅，就同時要向你來往嘅銀行同股票行申報，而佢哋又要向美國稅局申報；因為好煩，通常你就會因此失去埋個銀行同股票戶口。六﹕人走，帶錢走，是常識吧。不過，另一個更深嘅問題係，強迫金提唔提呢？我諗絕大多數人都等呢個機會好耐，係咪？我要提醒大家，香港人，一生就只有一次機會去宣誓提取迫金；即係話，你走過，提咗錢，假如日後返香港，你就同其他留港建港嘅手足一樣，點到要等到 65 歲。七﹕另外，由於全球資產回報率下降，迫金收費就高據不下，我都幾肯定你筆迫金數如果唔提走，最終都係益晒班迫金經理。所以，我都係建議你攞得幾多攞幾多，一蚊都唔好留響度畀人剝削。八﹕最大分歧嘅千萬元嘅題目係：「假如我有層樓，應唔應該賣咗佢？」假如你一直都有幾層樓收緊租，唔駛我教，你都有自己嘅睇法。但係，假如你得一層自住，又唔夠現金一炮過去目的地買當地嘅物業，你嘅考慮就係：「好唔好先將香港本來自住個層，用來收租？一來可以支付未來一段日子嘅需要，包括租金同日常支出。二來可以睇定啲。」另一個諗法就係：「索性賣咗香港層樓，去到當地一炮過搵間屋，過半退休生活。」九﹕其實，都係計一條簡單婆乸數。假如你香港層樓一早供完，咁我會覺得先收租，再諗放唔放，畢竟呢個係以不變應萬變嘅最好方法。外國其實好大，你真係唔知最終自己住落會唔會搬去其他城市；而且外國一般來講，買賣物業嘅成本都比較高，係咁買買賣賣等於益地產經紀。但係，假如你香港層樓仲供緊，租金扣除按揭還款同管理費之後所餘無幾，咁你就要諗下，係咪攞返一百幾十萬出來旁身。另一個做法就係加按套現，將錢暫時放入 mortgage link 戶口，有需要時先匯過去。但正如之前所講，又唔係個個國家對海外資產都咁包容，記得，報稅嘅時候要搵專業人士處理。十﹕但有一點要留意，就係人在海外，搵個好租客就更重要；香港都有代管租務物業嘅服務，大概收五個佣。題外話，我覺得呢門生意有得做，就算留島不留人，都總會有新香港人，係咪？十一﹕有啲國家係會徵收環球嘅資產增值稅，即係假如係移民之後，你出售海外資產又從中獲利，記得，搵專業人士去睇睇要唔要報稅。所以有啲人會選擇走之前賣樓，免麻煩。十二﹕最後，我想同大家講：「賣仔莫摸頭。」一個自己住過好多年嘅家，一定有好多美好珍貴嘅回憶，一定。但決定咗，就唔好諗返轉頭，唔好諗假如日後香港樓價股價嘅升跌，唔好諗。專心諗下自己同下一代未來嘅生活，融入新嘅文化，享受一個自由但有代價嘅社會。香港，本來就係一個由移民組成嘅地方，一個借來嘅時空。人哋要收返，要搶，要拉，要鎖，要點都好，最緊要係我哋記得，當年我哋，又或者我哋上一代，來到呢個地方，係因為呢度有自由。當年佢哋來嘅時候，情況比我哋艱苦好多，但總歸都捱過去；我哋要感恩，過去香港同香港人，畀咗我哋嘅美好嘅回憶。唔識珍惜嘅野蠻人，你畀晒啲鋼筋水泥佢哋，高樓大廈最終都會變頹垣敗瓦。話止於此，祝大家海闊天空，搵到自己理想嘅家。 作者簡介：利世民 – 身份繁多，對事物時刻保持着疑問及好奇心。興趣廣泛，熱愛範疇包括經濟財經、中西歷史、科技新知、心理學哲學、宗教政治，近來鑽研營養學，靠生酮飲食法四個月減去四十磅。思想開放，相信改變思考邏輯人生就會大不同，接受和而不同，但不能忍受行政霸權、學術官僚。經常自省，別變成自己討厭的人。利世民其他文章﹕財演不會告訴你的x個秘密 (利世民) 真．隱世富豪如何在逆境中投機電腦完勝人腦 被動更勝主動Die Broke – 斷捨離的個人理財哲學買樓前投資與投機的考慮*本文的內容均為作者的個人意見，並不代表GoBear HK的立場。伸延閱讀 【我要做業主】2019居屋+「白居二」全攻略【我要做業主】綠置居2019全攻略【首置上車盤】煥然懿居全攻略【財經專欄】唔夠首期？投資樓市三五知己拍住上！加息跌市齊降臨 買樓點避撻訂/按揭陷阱？ 【我要做業主】綠表、白表、白居二按揭注意事項
財演不會告訴你的x個秘密 (利世民)
財演，財經演員是也。究竟這個字源於何時，背後又有甚麼意思呢？今期阿啤邀得利世民為大家分析「財演不會告訴你的x個秘密」。一﹕我有位正在攻讀博士嘅朋友；佢出身財經記者，之後轉跑道做分析師，現在為一家資產管理公司做基金經理。他的博士論文題目是：「香港財演文化與金融市場」。二﹕我亦有其他朋友，任職金融機構不同崗位，但共通之處就是往往要粉墨登場在大眾媒體分析市場走勢；財經評論明星化，雖然不是香港獨有的現象，但可以肯定說，香港的財經評論明星之繁盛，舉世無雙。三﹕「財演」這個稱呼，應該始於蔡東豪手筆，其後成為日常用語。查粵語維基百科，我的另一個好朋友孫柏文，更被引用作為「財演」的例子。四﹕「財演」是一個貶詞；但事實上在廣大散戶心目中，這些評論員始終有一定的影響力，否則也不會江山代有人才出。我的觀察是，每次金融危機，都會有一批「財演」被淘汰，留下來的，就升格成大師。市場上極少數捱過九十年代尾亞洲金融風暴和2008年金融海嘯的，更加是殿堂級人馬，地位不動如山。五﹕不過，每一代「財演」都各有特色；尤其是自從十多年前，漸漸盛行「素人財演」，即是已經沒有任職金融機構的獨立評論員。某程度上，也是一種去中間化。「素人財演」追隨者眾，對散戶的影響力不亞於大行分析員。他們將艱深的金融消息和知識，簡化成牛頭角順嫂也聽得明白的結論，當然，最重要是他們極之懂得捕捉即市的情緒，與一眾散戶悲喜與共，齊上，齊落。六﹕我認識的「財演」，大多數都是全天候留意市況；當別人已經下班，他們仍然緊貼歐美股匯和夜期。當然，除了為追隨者「?」實國際大事，他們自己也是市場參與者。七﹕雖然最初「財演」這個稱呼帶有貶意，但我的朋友好像都不太介意；畢竟，他們能夠做到與追隨者同氣連枝，甚至娛樂圈的藝人，又或者政客名流，都未必可以有這層次的交流。近來，越來越多「財演」開班授徒，收入甚豐；演藝界和政壇，都未必能重複這個營運模式。八﹕「財演」大多數都是技術分析，但也有少數會鑽研企業基礎因素。坦白講，以我個人的認知，絕大多數「財演」的基礎分析，都流於表面。金融市場的遊戲，始終就是一場資訊不對稱的博弈；除非是企業極高層的內幕消息，否則基礎因素分析都是憑歷史資料預測未來，準確度必然不是百分百。九﹕純粹的技術分析，就好似小說《笑傲江湖》裡的獨孤九劍一樣，就是要因時制宜，沒有內功內力反而沒有包袱。十﹕當然，有時面對市場需求，善於以技術分析睇即時走勢的「財演」朋友，在企業公布業績之後，也會評論個別企業的前景。當然，他們都是見多識廣的人物，觀點也不會一無是處。十一﹕不過，我認識最會基礎分析的「財演」，大多有種「雖千萬人吾往矣」的氣概；他們往往可以在主流意見中，找出最大的盲點。這一派別的信念是：「在別人恐懼時要貪婪；別人貪婪時，要恐懼。」十二﹕基礎分析派賺大錢，除了要有心理質素，更加要有深厚的實力，也就是我們常說的；「本多終勝。」畢菲特，Ray Dalio 等，當然可以忠於他們所相信的分析，可是一般散戶，要有此等修為，又談何容易？十三﹕有一點可以肯定，不少「財演」朋友是言行一致；他們會投注在自己的建議。不過，這也不代表甚麼；他們也是人，也會錯。十四﹕以前我久不久會客串財經節目，也算是一個過氣的「財演」吧；我的觀察是，許多觀眾聽眾都會問「冧巴」，但信與不信，又是另一回事。更經常見到的是，觀眾聽眾早有打算，問「財演」也只是求個心安理得。有時候，我們根本不用對個別股份有甚麼心得，反而問一句：「點解你會睇好呢間公司？」已經可以得到答案。十五﹕其實「財演」未必有甚麼內幕消息。真正有消息的時候，也得要將消息當分析。反之，有時候沒有消息，就要將分析當消息。十六﹕消息和分析，表面上看似差不多，但意義差天共地。記住，金融市場是資訊不對稱的博弈，天下也沒有免費午餐，所以過濾市場訊息，第一步就是分清楚消息和分析。具參考價值的消息，極罕有。而具前瞻性的分析，通常都與主流意識相違背。所以，有人選擇避開市場嘈音，索性純粹只分析走勢，修練即市「獨孤九劍」，找出各種的不合理情緒， 在波動中短炒搵食。十七﹕假如你自覺沒有「逆市」（Contrarian）的氣魄，只想順勢而為，我建議是長期持有收費極相宜的指數 ETF，靜靜地贏；有本，自然可以長久。 想開個證券戶口買股票？立即用GoBear一click比較。比較港股股票戶口利世民其他文章﹕真．隱世富豪如何在逆境中投機電腦完勝人腦 被動更勝主動Die Broke – 斷捨離的個人理財哲學買樓前投資與投機的考慮*本文的內容均為作者的個人意見，並不代表GoBear HK的立場。伸延閱讀 【我要做業主】2019居屋+「白居二」全攻略【我要做業主】綠置居2019全攻略【首置上車盤】煥然懿居全攻略【財經專欄】唔夠首期？投資樓市三五知己拍住上！加息跌市齊降臨 買樓點避撻訂/按揭陷阱？ 【我要做業主】綠表、白表、白居二按揭注意事項
How to send money to Cuba from Hong Kong
Learn what you should know if you want to send money to a loved one in Cuba.
