Finder is committed to editorial independence. While we receive compensation when you click links to partners, they do not influence our content.
產能過盛下的投機思維 (利世民)
原油產能過剩問題嚴重，然而，產能過剩的又點止原油呢？究竟產能過剩對於投資者有咩啟示呢？今期阿啤邀得利世民為大家分析產能過盛下的投機思維。
一﹕其實有咩嘅價錢唔係越平越好？電話越平，咪即係市場有競爭，好事喎？食物亦如是。點解油價跌，財經界就如臨大敵？
二﹕第一個解釋，係油價跌反映需求跌，需求跌，反映經濟差。經濟差，是咪要驚？不過，經濟差都唔係新聞；價格反映現實，又有乜好驚呢其實？
三﹕但第一個解釋，其實只係事實嘅一半。因為今次油價跌到史上新低，更主要嘅原因係油組同其他成員國竟然揀呢個時候去增產，呢個現象其實好唔尋常，因為咁樣增產令原油價格大跌，對石油出產國都有好大代價。
四﹕最傷係邊個？其中一個係世界最大出產國，美國，尤其係頁岩氣嘅公司。雖然美國、油組成員國同俄羅斯最終四月中都達成協議減產，但原油價格繼續跌，而且有預測指，就算疫情過去都未必會扭轉目前嘅趨勢。更有分析認為，其實一早已經出現產能過剩嘅問題，疫情，只係市場結構調整嘅觸發點。
五﹕除咗能源，好廣義咁去睇，呢個世界產能過剩嘅又何止原油？資訊一樣係泛濫，所以你見傳媒辛苦經營就知，原來市場真係可以失效，而且短期入面真係會出現大家都泥足深陷嘅情況。
六﹕資訊同傳媒，原油同油公司，呢兩對類比，其實好有意義。但再睇深一層，兩個表面上風馬牛不相及嘅產業，殊途同歸。過去百幾年現代資本主義嘅演變，當然有好多唔同嘅範疇，例如國際貿易、財經金融等，但能源同資訊產業，其實係背後兩個最主要嘅價值支柱。兩者都出現「產能過剩」，對我哋又有咩啟示？
七﹕從大歷史嘅角度，由農業社會到工業社會，最大轉變係化石燃料嘅應用；人類將億萬年前儲低嘅能量，響百幾年之內釋放，雖然效率一般，但帶來嘅效果都仍然極之顯著。與此同時，由工業到後工業，好廣義嘅生產由實體商品到冇實體嘅資訊產品，當然消耗嘅能源比例唔一樣，但從價值嘅角度，係更加有效。
八﹕所以，如果你睇地球上市值最大嘅十間企業 Apple、Alphabet、Microsoft、Amazon、阿里巴巴、騰訊、Facebook、巴郡、Visa、Johnson and Johnson，當中嘅價值，近乎完全係來自資訊。其實資訊一早就已經係經濟價值最高嘅產品，實物只不過係承體。甚至乎 Johnson and Johnson 嘅市值裡面，都有好多係來自品牌同各種無形嘅 know-how，唔通真係洗頭水嘅原材料同庫存咁值錢咩。
九﹕至於金融業，其實就更加係一個資訊嘅行業。撐遠少少講，有日，我同朋友討論原油期貨價格去到負值呢個超自然現象，好感嘆咁講咗句：「負數呢個發明，真係可能係人類文明嘅一大突破，亦都係人類由單純嘅動物存在，進入靈性虛擬嘅一大進步。」事實上，負數呢個概念最早可以追溯到公元七世紀嘅印度，但十八世紀英國數學家宣稱佢哋提出一套負數嘅完整觀念。
十﹕原油期貨價格去到負數，係好神奇嘅一件事，坊間都已經有唔少解釋，不贅。我想補充一點就係，假如將原油現貨價錢減去期貨嘅價錢，反映咗大家所謂嘅儲存成本，即係最高峰嘅時候，呢個差價反映每桶原油嘅運輸儲存成本高達40美元。聽落有少少唔合理，但假設價格有效反映現實，即係話成個石油能源產業中、下遊成本都幾誇張。
十一﹕金融財經可以視為一個系統裡面嘅零和遊戲。有好奇心嘅人一定會問：「究竟邊個接咗呢啲有錢收又有貨收嘅原油期貨？」好順理成章咁諗，就梗係有能力去接收呢啲原油嘅公司，究竟佢哋又係咩人？
十二﹕其實人人都話：「原油儲存嘅地方冇晒喇。」從投機角度，呢個仲唔係商機？當然，你家陣話要增加庫存嘅地方，係無可能嘅。但如果你相信呢個現象會維持一段日子，咁石油能源產業中遊嘅作業，咪好好生意？
十三﹕舉例講，美國上市公司 Equitrans Midstream Corp，代號 ETRN ，過去一個股價由3月27日最低嘅 4.2 美元，一個月內升破 8 美元。順帶一提，呢隻股嘅派息係 22.47%，市盈率得 3.54 倍；當然咁大隻蛤那隨街跳，代表背後風險都極高。荷蘭公司 Koninklijke Vopak，主要業務係運油輪，呢段期間股價都升咗一成。
十四﹕話說回頭，以上講個現象，可能只會維持一個好短暫嘅時間。從今次危機見到，石油能源工業嘅平衡係非常之咁敏感，供求稍為些微出現變化，對盈利同價格都可以有好大影響，亦都係呢個理由，相關嘅資產同衍生工具，好適合去做價格投機。但我個人建議投機者要有心理準備，世上冇必贏嘅賭博，潛在回報越大，風險亦都越大。
十五﹕理論上，除非人類文明有好翻天覆地嘅轉變，否則對能源嘅需求終歸會返到去長遠嘅軌跡。反而我覺得，資訊泛濫嘅泡沫，先至係嚟緊下一波嘅衝擊。傳統製作內容嘅媒體娛樂企業，裁員結業，不在話下。最近甚至見到消息指 YouTube 廣告收入大跌，唔少 KOL 轉營收費模式。以往數以億計嘅大堆頭製作預算，將會成為歷史。
十六﹕反正一日得廿四小時，又邊睇得咁多嘢？所以，我睇淡媒體娛樂業；例如 Walt Disney Co，最風光嘅日子，應該已成過去。其他傳統依賴廣告同訂閱收入嘅，只要係製作資訊內容，唔理係電影、新聞甚至乎係遊戲，我都唔睇好。
十七﹕技術含量高嘅企業，重點已經放響點樣去用科技去縮短成個經濟價值鏈，Alphabet、Microsoft、Amazon 都屬於呢一類。Facebook 我有保留，唔係話用戶人數升跌嘅問題，而係作為一個媒介，佢有幾大嘅能耐去將價值轉化成收入。
想開個證券戶口買股票？立即用GoBear一click比較。
利世民其他文章﹕
*本文的內容均為作者的個人意見，並不代表GoBear HK的立場。
伸延閱讀
More guides on Finder
-
華盛証券評價
本文將深入介紹華盛証券，並從產品特色、功能、費用及安全性等作出評價，全面分析華盛証券優點及缺點。
-
Zacks Trade介紹及評價
深入了解Zacks Trade的服務、功能及費用等資訊。
Ask an Expert